Let's Get It Straight: MCGI Be Like--Hypocrisy Series No. 05: Paano Nililihis ng MCGI ang mga Kasulatan Para Hamakin ang mga Umalis

“Maigi ang wakas ng isang bagay kay sa pasimula niyaon: at ang matiising loob ay maigi kay sa palalong loob.”— Eclesiastes 7:8, Ang Dating Biblia (1905)

Madalas gamitin ni Kuya Daniel Razon ang talatang ito sa kaniyang mga panayam at pangangaral. Inihahalimbawa pa niya ito sa isang larong basketball: na anuman ang sipag mo sa unang tatlong quarter, kung umatras ka sa ikaapat, para mo na ring isinuko ang laban. Ipinapahiwatig niyang kung iniwan mo ang samahan nilang Members Church of God International (MCGI), ay para bang isinayang mo na ang lahat ng iyong ginawang paglilingkod sa Diyos.

Ngunit ang ganitong interpretasyon ay hindi lamang mapanligaw, ito rin ay mapanlinlang. Sapagkat hindi lahat ng pag-alis ay pagtataksil, at hindi lahat ng pananatili ay katapatan.

Umalis kami, hindi upang tumalikod sa pananampalataya, kundi upang tumindig para sa katotohanan.

Umalis kami hindi mula sa Iglesiang itinayo ni Kristo, kundi mula sa isang samahang itinayo ng tao—isang grupong unti-unting lumilihis sa mga simulain at aral na minsang ipinaglaban ng yumaong Bro. Eli Soriano. Nakalulungkot mang tanggapin, ang kasalukuyang pamunuan ay tila mas masigasig na ngayon sa pagtataguyod ng reputasyon at proyekto kaysa sa pagtataguyod ng dalisay na doktrina ni Kristo.

Ang masakit, ginagamit pa ang mga banal na kasulatan bilang sandata upang takutin at ikondena ang mga kapatid na nanindigan para sa kanilang konsensya. Para bang ang Diyos ay eksklusibong nananahan lamang sa kanilang samahan, at sinumang lumabas ay agad na hinatulang mapapahamak.

As members exit, the financial burden of those trapped inside MCGI intensifies as they will cover lost revenues to keep the structure of oppression afloat. This results to more member exodus leading to MCGI's structural collapse.

Ngunit mali po ito. Sapagkat ang Iglesiang itinayo ni Kristo ay hindi nakatali sa isang organisasyon. Hindi ito nasusukat sa kung ano ang nakasulat sa rehistro ng gobyerno, kundi sa kung ang aral ay nananatiling dalisay, at ang pamumuhay ay alinsunod sa katuwiran.

“At sinasabi ko naman sa iyo, na ikaw ay Pedro, at sa ibabaw ng batong ito ay itatayo ko ang aking iglesia; at ang mga pintuan ng Hades ay hindi magsisipanaig laban sa kaniya.”— Mateo 16:18

Kung ang MCGI ay tunay na Iglesia pa rin ni Kristo, hindi ito dapat natitinag ng pagsisiyasat, kritisismo, o pagpuna mula sa dating mga kapatid. Ngunit tila baligtad ang nangyayari—anumang pagsubok sa aral ay itinuturing agad na pag-uusig, at ang sinumang umalis ay minamaliit, nililibak, at sinisiraan.

“Nagsimula kayo sa Espiritu, ngayon ba'y tatapusin ninyo sa laman?”— Galacia 3:3

Ang samahang minsang puno ng tapang sa paglalantad ng katotohanan, ngayo’y tila naging tahimik sa harap ng mga paglihis sa doktrina, habang mas aktibo sa pagtatayo ng gusali at pagpapalago ng negosyo. Sa kanila natupad ang babala ng Panginoon:

“At kung ang bulag ay patnubay ng bulag, kapuwa sila mahuhulog sa hukay.”— Mateo 15:14

Isang Paalala sa mga Kapatid

Hindi po namin isinuko ang Diyos. Hindi po kami bumitiw sa pananampalataya. Sa halip, pinili naming lumakad sa mas masikip at mas masakit na daan—ang landas ng pagsunod sa tinig ng konsensya, kahit ito'y humantong sa paglayo sa isang samahang dati naming inakalang kailanma’y hindi malilihis.

Hindi po kami galit. Pero hindi rin kami pipikit sa katotohanan. Mali ang ginagawa ni Kuya Daniel Razon. Mali ang pagmamanipula sa damdamin ng mga kapatid. Mali ang paggamit ng Banal na Kasulatan upang siraan ang mga umalis.

At lalong mali ang pagkukunwaring sila pa rin ang tanging samahan ng Diyos, kahit ang mga gawa ay sumasalungat na sa aral.

Sa huli, ang tanong ay hindi kung kaninong samahan tayo nabibilang—kundi kung ang ating puso ay nananatiling tapat sa Panginoon.

“Datapuwa’t siyang magtitiis hanggang sa wakas ay siyang maliligtas.”— Mateo 24:13

Ang tunay na pagtatapat sa Diyos ay hindi palaging pananatili. Minsan, ito’y pagtindig. Minsan, ito’y paglayo mula sa mga huwad, upang makapanatili sa tunay.

At sa kabila ng paninirang ibinabato sa amin, ito lamang ang aming ipinagpapasalamat: na hindi kami iniwan ng Diyos, at kailanma’y hindi Siya lumayo sa mga naghahanap sa Kanya nang buong puso.

“Ang Panginoon ay malapit sa kanila na may bagbag na puso; at inililigtas ang mga may espiritung nagsisisi.”— Mga Awit 34:18